விடை 3265

இன்று (02/04/2018) காலை வெளியான வெடி
மெழுகு உள்ளே வர மஞ்சளாய் மலரும் மரம் (4)
இதற்கான விடை:  பூவரசு = பூசு + வர ; பூசு = மெழுகு (வினைச் சொல்லாய்)

அரசமரத்தின் இலைகளைபோன்ற அமைப்புடன் ஆனால் அழகான மஞ்சள் நிறப் பூக்கள் கொண்டதால் இம்மரம் பூவரசு என்று சொல்லப்படுகிறது.
சிறுவயதில் கிராமத்திற்கு விடுமுறைகளில் சித்தப்பா வீட்டிற்குச் செல்லும்போதெல்லாம் கொல்லைப் பக்கத்தில் இதன் இலைகளைப் பறித்து ஊதல் செய்து விளையாடுவோம்.

விசேஷம் வந்தால் அக்கா, அண்ணி எல்லாம் எங்களையெல்லாம் கூப்பிட்டு  தம்பிகளா நெறைய பூவரச எலை பறிச்சிட்டு வாங்கப்பா கொழுக்கட்டை சுடுவோம் என்று சொல்லுவோர்கள். அதிக உயரமில்லாத மரமாதலால்  எளிதில் பறித்துவிடுவோம். ஒவ்வொரு இலையிலும் எள்ளு பூரணமும் பருப்பு பூரணமும் வைத்து மடித்து இட்லிப்பானையில் வேக வைத்து கொழுக்கட்டையை சுடுவார்கள். பச்சையான இலை வெந்தபின் திட்டுதிட்டாய் சாம்பல் நிறமாகி  அதைப் பிரித்து நாங்களும் ஆவலாய் இலை வாசனை கொண்ட கொழுக்கட்டையைச் சாப்பிடுவோம்.

 நான் பணிபுரியும் பல்கலைக் கழக வளாகத்தில் பூவரச மரம்.

பின்வரும் காணொளியில் முதல் 10-12 வினாடிகள் அழகான நிறத்தில் பார்க்கலாம்:  https://www.youtube.com/watch?v=3FQWrc80nL0

மற்ற பூக்களைவிட இதில் வித்தியாசமான குணம் ஒன்று. வாடும்போது அதன் மஞ்சள் தன்மை குறைந்து சிவக்க ஆரம்பித்து இன்னமும் அழகாகி  சில நாட்கள் மரத்தில் இருந்த பின்தான் உதிரும்! 

இப்படிப்பட்டப்  பூவரசை வியந்து ஓர் அறுசீர் ஆசிரிய விருத்தம் (டக்கு டக்கு கடிகாரம் என்ற அழ. வள்ளியப்பாவின் பாப்பாப் பாட்டு நினைவிருக்கிறதா? அதே சந்தத்தில்)

புசித்து மகிழுங் கொழுக்கட்டைப்
        பூரணந் தாங்கத் தந்திடுவாய்
பசிய இலைகள் நடுவினிலே
        பார்த்துச் சிரிக்கும் மஞ்சட்பூ
வசியம் செய்து  கவர்ந்திடுமே
        வாடிய போதும் பொலிவுறுமே
ஒசிந்து கவிழ்ந்து செவ்விதழால்
        உலகை மயக்கும் வனப்புடையாய்

( வாடிய பூவரசம்பூ! இந்த படம் வலையில் சுட்டது).