வலையுலகில் ஒளிந்துள்ள புதிர்ப் பக்கங்கள்

வாட்ஸப்பிலிருந்து வலைப்பதிவுக்கு உதிரிவெடி குடி மாறி ஒரு மாதம் முடித்து விட்டது.
வலையில் பல வருடங்களாகப் புதிர் அளிப்பவர்கள் பலர் இருக்கின்றனர்.  நான் அளிக்கும் இந்த சில்லறையெல்லாம் போதாது, கற்றை கற்றையாக இருந்தால் நல்லா இருக்குமே என்று நினைப்பவர்களுக்கு இப்பதிவு:

1. இலவசக் கொத்தனார்  2008ஆம் ஆண்டில் பல புதிர்கள் செய்திருக்கிறார்.
இந்த (cryptic clues)  வெடிகளைப் புதைபுதிர்  என்று அழகானப் பெயரை முன்மொழிந்தவர் அவரே.
இங்கே தொடங்கித் தேடவும்:
http://elavasam.blogspot.in/2008/08/blog-post.html
பதம் பார்க்க ஒன்று:   வயதானால் தெரியும் தன் விலாசம் (4)

2. அபாகு‍ பார்த்தசாரதி நூற்றுக்கும் மேற்பட்ட புதிர்கள் செய்துள்ளார். ஆங்கிலப்புதிர்கள் குறித்தும் அவர் நிறைய எழுதியுள்ளார். அவருடைய வலை முகவரி:
http://www.sparthasarathy.com/crosswords/indexcw_tamil.html#current
அவருடைய கைவண்ணத்தில் உருவான மாதிரிகள் இரண்டு:
கடை பாசந்தி விலை அதிகம் என்றாலும் சுவை குன்றாது (5)
முதல் சாரணனுக்கு உதவித்தொகை கிடைப்பது எளிது (5)

3. முத்து சுப்ரமண்யம் சொல்கலை, கலைமொழி என்று பலவிதமான  விளையாட்டுகளை அவருடைய பதிவில் தொடர்ந்து 5 வருடங்களாக அளித்து வருகிறார்.
https://muthuputhir.blogspot.com/
அவருடைய உருவாக்கத்தில் ஒரு புதிர்:
நித்தம் வரும் நிலவு வருத்தம் போக்கித் தரும் மன அமைதி. (4)

4. உருவாக்குவதற்குக் கடினமான புதிர்கள் என்று நான் கருதுவது திரைஜாலம் வலைப்பதிவில் ராமராவ் அவர்கள் அளித்துவரும் புதிர்கள். அதற்குப் பலர் விடையும் கண்டுபிடித்துவிடுகிறார்கள். நான் ஒரு ரகசியம் சொல்லிவிடுகிறேன்: பல திரைப்படப் பாடல்கள், படங்கள் தெரிந்தும் ராமராவின் புதிர்களுக்கு  என்னால் ஒருமுறை கூட விடை கண்டுபிடிக்க முடிந்ததில்லை.
http://thiraijaalam.blogspot.in

5. வைத்யநாதன் என்பவரும் புதிர்களைப் பல வருடங்களாக‌ வெளியிட்டு வருகிறார்:
http://ramavnathan.blogspot.in/
அவருடைய படைப்பிலிருந்து ஒன்று:
வந்தது யாரென அறிய கிலி கலந்த விளி (3)

6. இன்னொரு வலைத்தளம்:
https://ilakyaa.wordpress.com


முத்து சுப்ரமண்யம் கருத்துரையில் சொல்லியிருப்பது போல் யோசிப்பவர், நாகராஜன் அப்பிச்சிக் கவுண்டர், குன்னத்தூர் சந்தானம் இவர்களும் ஹரி பாலகிருஷ்ணன் அளித்துள்ள கட்டவலையை அளிக்கும் மென்பொருள் கொண்டு பல புதிர்களை அளித்துள்ளார்கள்.

பூங்கோதை என்பவரும் சில புதிர்களைச் செய்திருக்கிறார். அத்ற்கான வலை முகவரி தெரிந்தால் சொல்கிறேன். அவருடைய புதிர்களில் ஏழெட்டு வருடங்கள் ஆன பின்னும் நினைவில் நிற்கும் அழகானவை:
ராமன் எத்தனை வருடம் காட்டுக்குப் போனால் என்ன? அர்ஜுனன் செத்தால் திரௌபதிக்கு என்ன? (5)

வலையில் எழுதினேன். கணவனைத் துறந்தேன் (6)

எல்லா விதமான புதிர்வகைகளையும் ஒரு வட்டமடித்து வாருங்கள்!