விடை 3620

பக்தி பல விதங்களில் வெளிப்படுவதை பக்தர்கள் எழுதிய இலக்கியங்களைப் படித்தால் சட்டென விளங்கும்.  "கருணையின் கடலே,  எல்லையில்லாதவனே, எங்கும் நிறைந்திருப்பவனே" என்று பலர்  கடவுளின் குணத்தைப் பாடுகிறார்கள்.   "இப்படியெல்லாம் மோசமாயிருந்த என்னை நல்லவழிப் படுத்தியவனே" என்று கடவுள் மனிதனுக்குச் செய்ததை வேறு சிலர் பாடுகிறார்கள். இன்னமும் சிலர் சிலையழகு,  அலங்கரிக்கும் பூமாலைகள், பட்டாடைகள், ஜொலிக்கும் வைர மூக்குத்தி, சந்தனக் காப்பு என்று   விவரித்து  மனிதர்கள் கடவுளுக்கு அணிவித்த ஆடை ஆபரணங்களில்  மனதைப் பறி கொடுத்துப் பாடுகிறார்கள்.

இன்றைய புதிரில் வந்த சிவனடியார்  நிர்க்குணனே என்று பாடுபவர் போலிருக்கிறது. இப்படி அலங்கார உடை தரித்த‌ இறைவனை தரிசிப்பதில் நாட்டமின்றி ஓடிப் போய்விட்டார்.
உடையணிந்த இறைவனைக் கண்ட சிவனடியார்களின்  முதல்வர்  ஓடினார் (4)
இதன் விடை:  தரித்த = தரிசித்த ‍- சி

அப்படி ஓடிப்போன ஒருவர் எழுதிய‌ ஒரு தத்துவப் பாடல் நாட்டுப்புற இலக்கியத்தில் வந்ததா, இல்லை சித்தர்கள் எழுதியதா தெரியாது, இங்கே கொடுக்கிறேன்:
 உள்ள தெய்வம் கல்லடா
 உலாவும் தெய்வம் செம்படா
பேசும் தெய்வம் நீயடா, நானடா
எல்லாத்துக்கும் பெரிய தெய்வம் சோறுடா!

இப்பாடலை எனக்குச் சிறு வயதில் விளக்கிச் சொன்னவர்  வழியாகத்தான் கோயில்களில்
மூலவர், உற்சவமூர்த்தி  என்ற இருவேறான  வடிவ‌ங்களைப் பற்றித் தெரிந்து கொண்டேன்.
என் அப்பா அடிக்கடி தாலுக்கா அலுவலகம் செல்வார். ஏதாவது நில விஷயமாக அவருடைய கையெழுத்து கொண்ட சான்றிதழை ஏழை உழவருக்காக ஒரு வழக்கு தொடர்பாக நீதி மன்றத்தில் காட்ட வேண்டியிருக்கும்.  ஆனால் தாசில்தார் எங்காவது மாவட்ட ஆட்சியரைப் பார்க்கவோ, அல்லது வேறு எங்காவதோ போயிருந்தால் இது நடக்காது. அதனால் இன்னொரு தாசில்தார், எப்போதும் அதே அலுவலகத்தில் அமர்ந்து இருக்கும்படி நியமித்திருப்பார்களாம். அவரை  என் அப்பா மூலவர் என்றும் மற்றவரை உற்சவ மூர்த்தி என்றும் சொல்வார்!

இன்றைய விடைகளின் பட்டியலை இங்கே பார்க்கவும்.