விடை 3824

இன்று காலை வெளியான வெடி:
சொல்லிக் கொடுத்து வைரம், புஷ்பராகம் இவற்றின்மேல் வரும் பைத்தியம்? (5)
அதற்கான விடை:  கற்பித்து = கல் + பித்து
நேற்றைய புதிரில் சந்தி பற்றி குறிப்பிட்டிருந்தேன். இன்று சந்தியல்லாத வேறொரு புணர்ச்சி விதியையொட்டி அமைக்கப்பட்ட புதிர்.

கடல்+ பாசி = கடற்பாசி,  மணல் + பாங்கு = மணற்பாங்கு , பல் + பசை  = பற்பசை.
இவ்வாறு 'ல்' தொடர்ந்து பகர வர்க்கம் வரும்போது அது "ற்" எனத் திரியும்  என்பதும் புணர்ச்சி விதியில் ஒன்று. 
இவ்விதி சில வடமொழிச் சொற்கள் தமிழில் கையாளப்படும்போதும்  எட்டிப் பார்க்கிறது: கல்பனா  தமிழில் கற்பனை ஆகிறது.
(அடடா கல்லாலான பனை மரம் என்று என்று புதிரமைக்கும் வாய்ப்பை நானே அம்பலப்படுத்திக் கெடுத்துக் கொண்டேன்).

அவ்வகையில் இன்று " கல்பித்து" என்பது "கற்பித்து" என்றாகிறது.
புதிரில் ஆர்வமுள்ள சொற்பித்தர்களுக்கு இதைக் கொண்டு அமைக்கப்பட்ட புதிர் ஒன்றும் கடினமில்லை என்பது இன்றைய பட்டியலின் நீளத்தைப் பார்த்தாலே தெரிகிறது.