இன்று காலை வெளியான வெடி:
பத்தின் கலவையில் ஒன்று குறைய எஞ்சியிருப்பது ஒரே தனிமம் (4)
அதற்கான விடை: தங்கம்.
வேதியியல் படி தங்கம் ஒரு தனிமம். தசாங்கம் என்ற வாசனைப் பொடி பத்து விதப் பொருட்களின் கலவை. அதிலிருந்து ஒன்று (அதாவது ஓரெழுத்தான 'சா') போக எஞ்சியது தங்கம்.
மிகவும் குறைவான விடைகள்தான் வந்திருப்பதால் தசாங்கம் என்றால் என்ன என்பதற்கு, கைக்குக் கிடைத்த (வணிக) வலைப்பக்கத்தைச் சுட்டிக் காட்டுகிறேன்.
'ஒரே' என்றது பத்தில் ஒன்று போய் ஒன்பது எஞ்சவில்லை, ஒன்றுதான் என்பதற்காக. நல்ல வேளை நான் வேதியியலைப் படிக்காமல் போனேன். இப்படி மோசமான கணக்கெல்லாம் வரும் பாடத்தை எப்படிப் புரிந்து கொள்வது?
இவ்வெடிக்கு அனுப்பப்பட்ட விடைகளை இங்கே காணலாம். என்றுமில்லாத அதிசயமாக 4 மணிக்குப் பிறகு ஏழெட்டு விடைகள் வந்துள்ளன.
Comments
******************
தசாங்கம்
இந்து சமயத்தில் பூஜை முதலியவற்றில் இறுதியில் காட்டும் தூப, தீபாரதனையில் தசாங்கம் என்னும் தூபம் பத்து வாசனைத் திரவியங்களினால் ஆன வாசனைப் பொடியை எரித்து நறுமனப் புகை உண்டாகுவதாகும். அதை முகர்ந்தால் நோய்கள் அகலும்; மேலும் எங்கும் நறுமணம் பரவி நல்ல சூழ்நிலை ஏற்படும்.
அந்த தசாங்கப் பவுடரில், சந்தனம், வெள்ளை அகில், குங்கிலியம், கோரைக் கிழங்கு, சாம்பிரானி, கார் அகில், மட்டிப்பால், தேவதாரு மரத்தூள் முதலிய பொருட்களின் பொடிகள் இருக்கும்.
********************
பத்தின் கலவையில் ஒன்று குறைய எஞ்சியிருப்பது ஒரே தனிமம் (4)
பத்தின் கலவை = தசாங்கம்
ஒன்று குறைய = தசாங்கம் - சா
எஞ்சியிருப்பது = தங்கம்
ஒரே தனிமம்
= தங்கம்
********************
இலக்கியத்தில் தசாங்கம் என்பது பத்து அம்சங்களை வைத்துப் பாடுவதாகும்.
திருவாசகத்தில் மாணிக்க வாசகர் திருத் தசாங்கம் என்ற பகுதியில் சிவபெருமான் மீது பாடிய பாடலில் தலைவனுடைய பெயர், நாடு, ஊர், ஆறு, மலை, குதிரை, படை, பறை/முரசு, மலை, கொடி என்ற பத்துறுப்புகளையும் வைத்துப் பாடி இருக்கிறார். இது அவர் தில்லைச் சிதம்பரத்தில் பாடிய பாடல்.
**************************