அமெரிக்க தேசத்து ஆச்சரியங்கள் - 1

ரவிசுந்தரம் உதிரிவெடியில் பல நாட்களாக ஆர்வத்துடன் பங்கேற்பதுடன்
விடைகளைப் பற்றி வாட்ஸப் குழுவில் பல விதமான தொடர்பான கருத்துகளை அளித்து வருவார். தன்னுடைய நண்பர்கள், உறவினர்களை என்று பலரையும்
இப்புதிர்களைப் பற்றிக் கூறி வரவழைத்திருக்கிறார்.

மின்னஞ்சல் மூலமாகவே பழக்கமான இவர் அமெரிக்கா வரும்போது தன்னுடைய வீட்டிற்குக் கட்டாயம் வரவேண்டும் என்று கூறியதன்பேரில்  அவர் வசிக்கும் பிட்ஸ்பர்க் நகருக்கு  மூன்று நாட்கள் சென்றேன். அவருடன் பேசினால் பல விஷயங்கள் கற்றுக் கொள்ளலாம்.

ரவி சுந்தரம் அமெரிக்க வரலாற்றைப் பற்றிப் பேசும்போது ஜார்ஜ் வாஷிங்டன் மனைவியின் தந்திரங்கள் பற்றிச் சொல்கிறார். ஸ்பெயின் நாட்டு வரலாற்றுடன் வண்டிவாஷ் போர் (வந்தவாசிப் போர்), ஆங்கிலேயர்கள் அடையாற்றில் 18ஆம் நூற்றாண்டில் தூப்ளேயை முறியத்தது எல்லாம் எப்படித் தொடர்புடையவை என்று கூறுகிறார்.
டெஸ்லா காரை ஓட்டிக் கொண்டு என்னைப் பல இடங்களுக்கு அழைத்துச் சென்ற போது  தாமஸ் ஆல்வா எடிசன்  எப்படிக் கயமையுடன்  நிகொலாஸ் டெஸ்லாவையும் ஆல்டெர்நேடிங் கரண்ட் பற்றியும் பல அவதூறுகளைப் பரப்பினார் என்று சொன்னார்.

நயாகரா அருவியில் டெஸ்லா நிர்மாணித்த மின் ஆலையின் விவரங்களையும், இப்போது அருவியில் கொட்டும் நீரை மின்சாரத்துக்குப் பயன்படுத்தாமல் சுற்றுலாப் பயணிகளைக் கவரும் பொருட்டு  விட்டு வைத்திருப்பதையும் கூறுகிறார். (இந்த அருவியில் ஒரு  நிமிடத்தில் விழும் தண்ணீரின் அளவு சென்னை மாநகராட்சி ஒரு நாளைக்கு வழங்கும் அளவுக்கும் மேற்பட்டது!)

 பின்னர் பிட்ஸ்பர்க் நகரைக் காட்டும் போது  கார்னெகி (Andrew Carnegie) என்பவர் எப்படி வசூல் ராஜாவாக வாழ்க்கையைத் தொடங்கி நிலக்கரிச் சுரங்கங்களை வாங்கும் அளவுக்கு முன்னேறி அதன் மூலம் எஃகு ஆலைகளையும் வாங்கி,  உலகிலேயே பெரிய பணக்காரராகி,  கடைசி காலத்தில் நல்ல பெயரெடுக்க வேண்டும் என்று தோன்றி சொத்தில் 90 சதவீதத்தை   நன்கொடையாக அளித்து  பல்கலைக் கழகத்தைத் தொடங்கியும் நாடெங்கிலும் நூல்நிலையங்களை அமைக்கவும்  செய்தார் என்ற  விவரங்களைக் கூறினார்.

ரவி சுந்தரம் தமிழ் எழுத்துகளை  டெக் (TeX) மென்பொருளில் உள்ளீடு செய்ய C மொழியில் 1990இல் செய்த முயற்சி பற்றியும் கூறுகிறார். அவர் அடுத்த முறை சென்னைக்கு வரும்போது எங்கள் கல்லூரியின் பொறியியல் மாணவர்களுக்குப் பயன்படுமாறு ஒருமுறை உரையாற்ற நான் வேண்டியதை ஏற்றுக் கொண்டார். அவரது மனைவி  அருணா, வங்கி வேலைக்கு நடுவில் பிட்ஸ்பர்க் கோவிலில் இயங்கும் குழுவில் முக்கிய பொறுப்பு வகித்து இந்தியக் குழந்தைகளுக்கான பண்பாட்டு நிகழ்ச்சிகளையும் நடத்தி வந்திருக்கிறார்,  எங்களைப்போல் வந்துகொண்டிருக்கும் விருந்தினர்களை ஊர் சுற்றிக் காட்டுவதும் உபசரிப்பதும் இன்முகத்தோடு செய்கிறார் என்பதைப் பார்க்கும் போது அமெரிக்காவில் வாழ்பவர்கள் வேலைக்கு ஆட்கள் இல்லாத போதும் எவ்வளவு விதமான பொறுப்புகளைத் தாமே செய்து கொள்கிறார்கள் என்பது ஆச்சரியமாய் இருக்கிறது.

சுந்தர் வேதாந்தமும் நான் ஆறு மாதங்கள் முன் வரை சந்தித்திராதவர்.
சொல்வனம் இணைய இதழில் அவருடைய  அறிவியல் கட்டுரைகள் ஒன்றிரண்டைப் படித்திருக்கிறேன்.  பென்சில்வேனியாவில் இன்டெல் நிறுவனத்தில் பணி புரியும் இவர் டிசம்பரில் சென்னை வந்த போது ஆர்வத்துடன் பல விஷயங்களைப் பேசினார். தமிழில் அறிவியல் புத்தக்ம் எழுதியதைக் கொடுத்தார்.   வெறும் பொழுதுபோக்குக்கு அல்லது பணி செய்வதற்கு  மட்டுமே புத்தகங்கள் என்றில்லாமல் சுவாரசிமாக விஷயங்களைக் கற்றுக் கொள்ள அவர் எழுதிய  சிந்தனைச் சோதனைகள்
 அருமையான புத்தகம்.

  அவரைச் சந்திக்க பென்சில்வேனியாவுக்கு அவர் வசிக்கும் ஆலன்டௌன் நகர் சென்றேன் என்றால் அது பொய்யாகிவிடும்.
பிட்ஸ்பர்கில் ரவியைச் சந்தித்து முடித்தவுடன், ரவி எங்களை அவருடைய காரில் 300கிமீ தொலைவிலுள்ள  பெயர் தெரியாத நகருக்கு  ஏதோ கடத்தல்காரர்கள் செய்த ஒப்பந்தம்போல்  எங்களை அழைத்து வந்தார். அங்கிருந்து சுந்தர் எங்களை அவருடைய காரில் அள்ளிக் கொண்டு வந்தார்.
கடத்தல்வேலையல்லவா? துப்பாக்கி விற்கும் கடையெல்லாம் தெரிந்து வைத்திருந்தார். அக்கடைக்கு எங்களை அழைத்துச் சென்றார்.  துப்பாக்கி எப்படி அமெரிக்க வாழ்க்கையில் இடம் பெறுகிறது என்பதைப் பற்றியும் வேட்டையாடுதல்
பற்றி நாமறியாத கோணங்களையும் பற்றிக் கூறினார். வேட்டையாடுதல் மூலம் அதே விலங்கைக் காப்பது பற்றியும் விசித்திரமான உண்மையைக் கூறினார்!

அதன் பிறகு அமெரிக்க விடுதலை வரலாற்றில் முக்கிய பங்காற்றிய  இடங்களை பிலடெல்பியா நகரில் சுற்றிக் காட்டினார். ஆமிஷ் என்ற கிறிஸ்தவ மதத்தின் பிரிவினர், தொழில்வளர்ச்சியை நிராகரித்து, மின்சாரம், கார்கள் இன்றி எளிய வாழ்க்கையை வாழும் மக்களைப் பற்றி அறிய ஓரிடத்திற்கு அழைத்துக் காட்டினார்.  உலகின் மக்கள் ஒரு நாட்டிலிருந்து மற்றொரு நாட்டிற்கு குடிபெயர்வதைப்
பற்றி அதிகம் படித்து வைத்து அதன் நன்மை தீமை என்ன, அதை ஆதரிப்போரும் எதிர்ப்போரும் கொண்டுவரும் காரணங்கள் என்ன என்று விவரமாகக் கூறுகிறார்.


தன்னுடைய மகன், மகள் இருவரும் அமெரிக்காவில் பெறும் கல்விமுறையின்  அணுகுமுறைய‌ அதிசயித்து  நம்நாட்டின் சிறந்த மாணவர்கள் பெறாததை வருத்தத்துடன் கூறுகிறார்.
இன்டெல் நிறுவனத்தின் உதவியுடன் தமிழ்நாட்டில் பள்ளி மாணர்களுக்கு ஏதாவது செய்ய வேண்டும் என்ற திட்டமிருப்பதைத் தெரிவித்தார். என்னையும் உதவிக்குச் சேர்த்துக் கொள்ளுங்கள் என்று கூறினேன்.  அவரும் அவரது மருத்துவர் மனைவி மாயாவும் உற்சாகத்தோடு அமெரிக்காவின்  வாழ்வுமுறைகளைப் பற்றிப் பல விஷயங்களைத் தெரிவித்தனர். கவலை இல்லாமல் கடன் வாங்கிச் செலவு செய்வது, வெயில் அதிகாமானால் மருத்துவரிடம் போவதை நிறுத்துவது, என்று பல விவரங்கள். என‌க்கு அமெரிக்கா என்றால் டமால் டுமீல் ஹாலிவுட் திரைப்படத்தில் வருவதுதான் தெரிந்திருந்தது. பல பாட‌ங்கள் இந்த விஜயத்தில் பெற்றேன்.