விடை 3733

இன்று   காலை வெளியான  வெடி
சுவரால் மறைக்கப்படாத இடம் மதிப்பு குறைவானதா? தரம் குறைவானது (5)
இதற்கான விடை:  தாழ்வாரம் = தாழ்வா + (த) ரம்
("பிறரை ஏமாற்றிப் பிழைப்பதுதான் தாழ்வு, மூட்டை சுமந்து சம்பாதிப்பதில் தாழ்வில்லை" என்பது போன்ற சொற்றொடர்களில் தாழ்வு என்ற சொல் மதிப்புக் குறைவானது என்ற பொருளிலேயே வருகிறது.)   தாழ்வாரம் வீட்டில் தெருப்புறமாகவோ அல்லது முற்றத்தை அடுத்தோ மூடு சுவரின்றி திறந்தவாறு இருக்கும்.

இந்த வெடிக்கு அனுப்பப்பட்ட விடைகளின் பட்டியலை இங்கே சென்று காணலாம்.

*******

நேற்று "பிரதாபம்" என்ற சொல்லைக் கையாண்டு ஞாபகப் படுத்தியதற்கு மகிழ்ச்சியைத்  தெரிவித்து  மீனாக்ஷி கணபதி தகவல் அனுப்பியிருந்தார்.  அதற்கு அவருக்கு நன்றி.

ஆனால் அவர் பாராட்டுவதுபோல் அச்சொல் தானே வந்து உதிரவில்லை.
 தமிழின் முதல் நாவல் பிரதாப முதலியார் சரித்திரம் என்ற தகவலை சமீபத்தில் மீண்டுமொருமுறை படித்தேன். அதைக் கொண்டு புதிரமைக்க வேண்டுமென்று அப்போது மனதுக்குள் சொல்லிக் கொண்டேன். ஆனால் புதிர் அத்தகவல் குறித்து போகாமல் வீர சாதனைக்குப் போய்விட்டது.

சென்ற வாரம் பினாத்தல் சுரேஷ், ராஜேஷ் ('இலவசம்') இருவரையும் சந்தித்த போது சுஜாதாவின் கதையான "விபரீதக் கோட்பாடு" பற்றிப் பேச்சு சென்றது. அப்போது "கோட்பாடு" தானாக வந்து சிக்கியது. பலமுறை திரைப்படப் பாடல்கள் கேட்கும்போது அதில் வரும் ஒரு சொல் அகப்பட்டுக் கொள்ளும்.  இப்படி முன்தீர்மானம் இல்லாத போது (வாரம் இரண்டு முறையாவது) க்ரியா அகராதியை கண்ணை மூடிக் கொண்டு ஏதோ ஒரு பக்கத்தைத் திறந்து அப்பக்கதிலிருந்து ஒரு சொல்லைத் தேர்ந்தெடுப்பேன்.

ஜெர்மனியில் இருந்த சமயம்தான் பாட்டும் கேட்காமல் க்ரியா அகராதியும் பக்கத்தில் இல்லாமல் சும்மாவே யோசித்துச் செய்ய வேண்டியிருந்தது.
ஏதாவது ஒரு வகையில் வாகான சொற்கள் இப்படி கைக்குத் தட்டுப்படும் வரையில் உதிரிவெடி நீடித்து வரும்.

சுந்தரராமசாமியின் ஜேஜே ஏளனம் செய்யும் சரித்திரக் கதாசிரியரான  திருச்சூர் கோபாலன் நாயருக்கு ஏதாவது பழையபாடல்களில் வாய்ப்பான வரி கிடைத்தால் போதுமாம், அதை வைத்து எண்ணூறு பக்கத்துக்கு கதை எழுதிவிடுவாராம். எனக்கு செய்ய வேண்டியதெல்லாம் ஏழெட்டு சொற்களில் புதிரமைப்பதுதான், அதைவிட சுலபமான காரியம்.