விடை 3539

இன்று காலை வெளியான வெடி:
தூய நிறங்கொண்ட பால் அரை சேர் பெரும்பாலும் நாலடி கொண்டது (3)
இதற்கான விடை: வெண்பா = வெண் + பா

வெண்பாக்கள் எல்லாம் அந்த காலத்தில் அவ்வைப் பாட்டியும் வாழ்க்கையே நிலையானதில்லை  என்று புத்திமதி கூறும் சமண முனிவர்களும்தான் (நாலடியார்)  எழுதினார்கள் என்று நினைத்திருந்தேன்.
காளமேகம் பல சிலேடைகள் வெண்பா வடிவில் எழுதியுள்ளார்.  "காக்கைக்கா காகூகை" என்று ககர எழுத்துகளை மட்டுமேயும் "தாதிதூதோ தீது" என்று தகரங்களை மட்டுமே கொண்டும் வெண்பாவை எழுதியுள்ள காளமேகம் இக்காலத்தில் இருந்தால்  அப்படியே ஓரத்தில் ஏகப்பட்ட குறுக்கெழுத்துப் புதிர்களை உருவாக்கியிருப்பார், என்னுடைய புதிரிலிருந்து உங்களுக்கு விடுதலை கிடைத்திருக்கும்!

சரி, இக்காலத்திலும் பலர் திறம்பட வெண்பாக்கள் எழுதி வருகின்றனர்.  என்ன இணையம் கோலோச்சும் காலத்திலா ? ஆமாம் அமெரிக்காவில் 1999ல் பெரியண்ணன் சந்திரசேகரன் என்ற அட்லாண்டாகாரர் "வெண்பா வடிக்கலாம் வா" என்ற  இணைய விவாதமேடை நடத்தி வந்தார்.

நானும்  சென்னை ஆன்லைன் இணைய இதழில் 2000-2001 ஆண்டுகளில் சுமார் 60 வாரங்கள் பலரும் எழுதிய வெண்பாக்களை சுடச்சுட "வெண்பாமேடை" என்ற தலைப்பில்  வெளியிட்டு வந்தேன்.

பாரதியார், கம்பன், மஹாபாரதம் இவையெல்லாம் ஆழ்ந்து படித்த  கவிஞர் ஹரிகிருஷ்ணன் இப்போது வெண்பாவுக்கு ஒரு வாட்ஸப்குழுவை  "ஈற்றடி என்றும் இனிப்பு"  என்ற பெயரில் ஆறு மாதங்களாக நடத்தி வருகிறார்.

அவர் அளிக்கும் ஈற்றடிக்குக் குழுவில் பலரும் சில நிமிடங்களில் பல வேறுபட்ட கருத்துகளைக் கொண்ட பாடல்களை அசரவைக்கும்படி எழுதுகின்றனர்.

உதாரணமாக "விண்ணில்  விழுந்த/விதைத்த  விதை" என்ற ஈற்றடி அக்டோபர் 8ஆம் தேதிக்கு அளிக்கப்பட்டபோது வெளிவந்த பாடல்களில் இரண்டு மாதிரிகள்

காய்ந்த சிவகாசிக் கந்தகத் தோட்டத்தில்
சேய்கள் விளைவித்த தீக்கனிகள் -- போய்எங்கும்
மண்ணில் வெடித்தெழும்பி  வானில் சிதறியதால்
விண்ணில்  விழுந்த விதை   --- (சங்கரசுப்ரமணியன்)


கரியாய்க் கிடந்து கணப்பொழுதில் ஓர்நாள்
பெரிதாய்  வெடித்துப் பெருகியதாம் அண்டமாய்
எண்ணம் குடைகிறது  ஏனெதற்கு யார்போட்டார்
விண்ணில் விதைத்த விதை ---  (பினாத்தல் சுரேஷ்)