திரிவெடி 3 விடைகள்

 இன்றைய திரிவெடியில் இடம் பெற்ற‌ சொற்கள்: உண்மை, புதுமை, கூர்மை, இளமை, செம்மை.

 
தனது கூர்வாளை ஏந்தி அந்த இளவயதினள் செம்மரங்கள் அடர்ந்த  காட்டில் சென்றது புதுவெள்ளம் புரண்டோடியது போலிருந்தது என்றால் அது மிகையாகாது, உண்சொல்லே.

 சாண்டில்யன் கதை போல் தொடங்கிய இந்த வாக்கியத்தில் கடைசியாக ஏதோ இடிப்பது போல் இருக்கிறதா? அதுதான் இன்றைய திரிவெடியில்  அடங்கிய பிணைப்பு.

 கூர்மை (கூர்), இளமை (இள), செம்மை(செம்), புதுமை (புது) என்பவை பண்புப்பெயர்கள்,  மையையிழந்து பெயரடையாகும். ஆனால் உண்மையோ பல்லையிளிக்கும் (அல்லது உண்ணென்று சொல்லி  வாயைத் திறக்க வைக்கும்).

மீ. கண்ணன், அகிலா ஸ்ரீதரன், ராமகிருஷ்ண ஈஸ்வரன் இம்மூவரும் சரியாக‌ இதைக் கண்டறிந்து விடையளித்திருக்கிறார்கள்.

  ஒரு சந்தேகம். சுற்றி எதுவும் இல்லாமல் தனிமையில் இருக்கும்  மரம் "தனிமரம்", வெண்மையாக வானில் மிதந்து வருவது "வெண்மேகம்" என்றால் , எங்கேயிருந்து இந்த "புதுமைப்பெண்" வந்தாள்? தெரிந்தவர்கள் விளக்கவும்.

 இப்புதிருக்கு விடையளித்தவர்கள் பட்டியலை இங்கே காணலாம்.